नवी दिल्ली : श्रीलंकेच्या पंतप्रधान डॉ. हरिनी अमरसूरिया गुरुवारी तीन दिवसांच्या भारत दौऱ्यावर येत आहेत. परराष्ट्र मंत्रालयाच्या माहितीनुसार, त्या १६ ते १८ ऑक्टोबर दरम्यान भारताच्या दौऱ्यावर येतील. पंतप्रधान म्हणून त्यांचा हा पहिलाच भारत दौरा असेल. श्रीलंकेच्या पंतप्रधान परस्पर हिताच्या द्विपक्षीय मुद्द्यांवर चर्चा करण्यासाठी भारतीय राजकीय नेत्यांशी भेट घेतील. या दौऱ्यादरम्यान, श्रीलंकेचे पंतप्रधान दिल्ली येथे एनडीटीव्ही आणि चिंतन रिसर्च फाउंडेशनने आयोजित केलेल्या ‘एनडीटीव्ही वर्ल्ड समिट’मध्ये मुख्य भाषण देतील. शिक्षण आणि तंत्रज्ञान क्षेत्रात सहकार्याचे मार्ग शोधण्यासाठी डॉ. हरिनी अमरसूरिया इंडियन इन्स्टिट्यूट ऑफ टेक्नॉलॉजी (आयआयटी) दिल्ली तसेच नीती आयोगालाही भेट देतील.
श्रीलंकेचे पंतप्रधान दिल्ली विद्यापीठातील हिंदू कॉलेज येथे एका प्रतिष्ठित माजी विद्यार्थी संघटनेच्या कार्यक्रमात सहभागी होतील. दोन्ही देशांमधील व्यावसायिक संबंध मजबूत करण्यासाठी त्या एका व्यावसायिक कार्यक्रमातही सहभागी होतील. परराष्ट्र मंत्रालयाने म्हटले आहे की, ही भेट भारत आणि श्रीलंका यांच्यातील नियमित उच्चस्तरीय देवाणघेवाणीच्या परंपरेनुसार आहे, ज्यामुळे खोल आणि बहुआयामी द्विपक्षीय संबंध वाढतात. भारताच्या ‘महासागर’ दृष्टिकोनामुळे आणि त्याच्या ‘शेजारी प्रथम’ धोरणामुळे मजबूत झालेल्या मैत्रीच्या बंधांना यामुळे आणखी बळकटी मिळेल.
