नवी दिल्ली : रशियाचे राष्ट्राध्यक्ष व्लादिमीर पुतिन यांच्या भारत भेटीची तारीख निश्चित झाली आहे. परराष्ट्र मंत्रालयाच्या माहितीनुसार, पुतिन ४ आणि ५ डिसेंबर रोजी भारताच्या औपचारिक दौऱ्यावर असतील. या काळात पुतिन मुख्यत्वे २३ व्या भारत–रशिया वार्षिक परिषदेत सहभागी होतील. या भेटीत पुतिन आणि मोदी दोन्ही देशांमधील द्विपक्षीय संबंधांवर चर्चा करतील. परराष्ट्र मंत्रालयाने जाहीर केलेल्या निवेदनानुसार, पंतप्रधान नरेंद्र मोदी यांच्या आमंत्रणावर पुतिन ४ डिसेंबर रोजी भारतात पोहोचतील. येथे ते पंतप्रधान मोदी यांची भेट घेऊन दोन्ही देशांमधील तेल खरेदी, संरक्षण सहकार्य आणि व्यापार यांसारख्या मोठ्या मुद्द्यांवर चर्चा करतील. याशिवाय, राष्ट्रपती द्रौपदी मुर्मू देखील पुतिन यांचे स्वागत करतील आणि त्यांची भेट घेतील.
याच वर्षी ऑगस्ट महिन्यात राष्ट्रीय सुरक्षा सल्लागार अजीत डोभाल यांच्या मॉस्को भेटीदरम्यान पुतिन यांच्या भारत दौऱ्याची घोषणा करण्यात आली होती, मात्र त्या वेळी नेमक्या तारखा निश्चित झालेल्या नव्हत्या. त्यानंतर मोदी आणि पुतिन चीनमध्ये झालेल्या शांघाय कोऑपरेशन ऑर्गनायझेशन (एससीओ) परिषदेत भेटले होते. यावेळी दोघांनी एका कारमध्ये बसून एक तास वेगळे चर्चाही केली होती.
