अरुणाचल प्रदेशमध्ये ड्रोनने होणार औषधांचे वितरण

नहरलगुन : ड्रोनच्या माध्यमातून औषधांचे वितरण करणारे अरुणाचल प्रदेश हे देशातील पहिले राज्य बनणार आहे. अरुणाचल प्रदेशातील नाहरलागुन शहरातील एका रुग्णालयात हे प्रक्षेपण होत आहे. यासंदर्भात राज्याच्या आरोग्य विभागातील अधिकाऱ्यांनी सांगितले की, टोमो रिबा आरोग्य आणि वैद्यकीय विज्ञान संस्था येथे एका अत्याधुनिक ड्रोन पोर्टचे उद्घाटन करण्यात आले आहे. रुग्णालयाच्या छतावर हे ड्रोन पोर्ट बसवण्यात आले आहे, जिथून ड्रोनद्वारे आवश्यक औषधे लोकांपर्यंत पोहोचवली जातील. राज्यातील दुर्गम ठिकाणी जलद गतीने औषधे पोहोचवण्यासाठी रुग्णालयाने ही नवीन पद्धत स्वीकारली आहे. अरुणाचल प्रदेशचा सुमारे 80 टक्के भाग डोंगराळ आहे, ज्यामुळे रस्ते बांधणी आव्हानात्मक आहे, परंतु येथे एक महत्त्वाचे रस्ते जाळे देखील आहे. डोंगराळ भागात रुग्णांना वेळेवर वैद्यकीय सुविधा पुरवणे हे एक मोठे आव्हान आहे. अशा परिस्थितीत, लोकांना आवश्यक औषधे पोहोचवण्यासाठी हा अनोखा उपक्रम हाती घेण्यात आला आहे. विशेष म्हणजे आपत्कालीन परिस्थितीत ऑपरेशनसाठी केवळ औषधेच नाही तर मानवी अवयव देखील ड्रोनद्वारे पाठवता येतात. अरुणाचल प्रदेश स्पेस ऍप्लिकेशन सेंटर (एपीएसएसी) द्वारे विकसित केलेल्या या सुविधेमुळे राज्यातील आपत्कालीन वैद्यकीय सेवांमध्ये मोठा बदल होण्याची अपेक्षा आहे.