दंतेवाडा : छत्तीसगडमधील दंतेवाडा जिल्ह्यात ‘लोन वर्राटू’ (घरवापसी) मोहिमेअंतर्गत बुधवारी चार महिला नक्षलवाद्यांसह १२ नक्षलवाद्यांनी पोलीस अधिक्षक गौरव रॉय यांच्यासमोर आत्मसमर्पण केले. त्यांच्यावर २८ लाख ५० हजार रुपयांचे बक्षीस जाहीर करण्यात आले होते. आत्मसमर्पण करणाऱ्या नक्षलवाद्यांची संख्या एक हजार ओलांडल्यावर एसपी गौरव राॅय यांनी केक कापून आनंद व्यक्त केला. सर्व आत्मसमर्पण करणाऱ्या नक्षलवाद्यांना पुनर्वसन धोरणांतर्गत प्रत्येकी ५०,००० रुपयांची मदत दिली जाईल, तसेच छत्तीसगड सरकारकडून कौशल्य विकास प्रशिक्षण, शेती जमीन इत्यादी सुविधा देण्यात येणार आहेत.
नक्षलवाद्यांना आत्मसमर्पण करण्यात डीआरजी, बस्तर फायटर्स, इंटेलिजेंस ब्रांच दंतेवाडा, आरएफटी (इंटेलिजेंस ब्रांच) दंतेवाडा, १११ वी बटालियन सीआरपीएफ आणि २४१ वी बटालियन सीआरपीएफ बस्तर यांनी योगदान दिले. दंतेवाडा पोलिस अधीक्षक कार्यालयाच्या म्हणण्यानुसार, आत्मसमर्पण करणाऱ्या १२ नक्षलवाद्यांमध्ये चंद्रना, गंगालूर (डीकेएसएम/पश्चिम बस्तर विभाग अध्यक्ष), अमित उर्फ हिंगा बारसा, जगरगुंडा (डीकेएसएम कंपनी क्रमांक १० सदस्य) यांचा समावेश आहे.
त्यांच्यावर आठ लाख रुपये बक्षीस होते. त्यांच्यासोबत, पाच लाखांचे बक्षीस असलेली अरुणा (डीकेएसएम वैद्यकीय पथकाची सदस्य), तीन लाखांचे बक्षीस असलेली देवा कवासी (लाइन नंबर ३२ कमांडर), दोन लाखांचे बक्षीस असलेली राजेश मडकाम (डीकेएसएम विजापूर अध्यक्ष), एक लाखांचे बक्षीस असलेली पायके ओयाम (परिया कमिटी पार्टी सदस्य) आणि प्रत्येकी ५० हजारांचे बक्षीस असलेली कोसा सोढी ईनमी (आरपीसी सदस्य), महेश लेकाम (आरपीसी सदस्य) आणि राजू करटाम (आरपीसी सदस्य) यांनीही आत्मसमर्पण केले आहे. त्यांच्याशिवाय हिडमे कोवासी, जीबू उर्फ रोशन आणि अनिल लेकाम नावाच्या नक्षलवाद्यांनीही आत्मसमर्पण केले आहे, त्यांच्यावर कोणतेही बक्षीस जाहीर केलेले नव्हते.
जून २०२० मध्ये सुरू झालेल्या ‘लोन वर्राटू’ (घरवापसी) मोहिमेअंतर्गत, आतापर्यंत १००५ नक्षलवाद्यांनी हिंसेचा मार्ग सोडून आत्मसमर्पण केले आहे. ज्यामध्ये २०५ इनामी नक्षलवाद्यांचाही समावेश आहे. छत्तीसगड सरकारच्या पुनर्वसन धोरणांतर्गत, आत्मसमर्पण केलेल्या आणि अटक केलेल्या नक्षलवाद्यांची आणि परिसरात सक्रिय असलेल्या खबरींची सखोल चौकशी करून नक्षलवाद्यांचे प्रोफाइल तयार करण्यात आले आहे. त्यानंतर, नक्षलवाद्यांची पोलीस ठाण्यांनुसार यादी तयार करण्यात आली आणि सक्रिय इनामी नक्षलवाद्यांची नावे संबंधित पोलिस ठाणे, कॅम्प आणि ग्रामपंचायतींमध्ये चिकटवण्यात आली आहेत. त्याचाच भाग म्हणून जून २०२० पासून दंतेवाडा पोलिसांकडून ‘लोन वर्राटू’ मोहीम राबविली जात आहे. ज्याअंतर्गत नक्षलवादी संघटनेत सक्रिय असलेल्या लोकांना मुख्य प्रवाहात परत येण्याचे आणि सन्मानजनक जीवन जगण्याचे आवाहन सतत केले जात आहे.
