मुंबई : दिग्दर्शक विवेक रंजन अग्निहोत्री यांनी मुख्यमंत्री ममता बॅनर्जी यांना त्यांच्या संवैधानिक शपथेचा दाखला देत सांगितले की, एका मुख्यमंत्र्याचे पहिले कर्तव्य हे असते की, त्यांनी राज्यातील नागरिकांच्या अभिव्यक्ती स्वातंत्र्याचे रक्षण करावे. अग्निहोत्री यांचे म्हणणे आहे की, जेव्हा चित्रपटाला सेंट्रल बोर्ड ऑफ फिल्म सर्टिफिकेशन (सीबीएफसी) कडून मंजुरी मिळाली आहे, तेव्हा कोणत्याही प्रकारे त्याला अडवणे हे संविधानाच्या विरोधात आहे.
विवेक रंजन अग्निहोत्री पुन्हा एकदा आपल्या नवीन चित्रपट ‘द बंगाल फाइल्स’ मुळे चर्चेत आले आहेत. हा चित्रपट १६ ऑगस्ट १९४६ च्या डायरेक्ट अ‍ॅक्शन डे आणि त्यानंतर झालेल्या नोआखाली हत्याकांडावर आधारित आहे. ‘द बंगाल फाइल्स’ हा चित्रपट ५ सप्टेंबर रोजी चित्रपटगृहांमध्ये प्रदर्शित होणार आहे. मात्र त्याआधीच या चित्रपटाला विरोध होऊ लागला असून त्यावर बंदी घालण्याची मागणी केली जात आहे.आता या चित्रपटाचे दिग्दर्शक विवेक अग्निहोत्री यांनी मुख्यमंत्री ममता बॅनर्जी यांच्याकडे एक विशेष विनंती केली आहे. त्यांनी एक व्हिडीओ मेसेज शेअर केला आहे, ज्यामध्ये त्यांनी सांगितले आहे की, हा चित्रपट बंगालमध्ये का प्रदर्शित होणं आवश्यक आहे.
विवेक अग्निहोत्रींच्या म्हणण्यानुसार, पश्चिम बंगालमधील अनेक प्रदर्शक राजकीय दबावामुळे हा चित्रपट थिएटरमध्ये लावण्यास घाबरत आहेत. त्यांचे म्हणणे आहे की, अनेक लोक चित्रपटाची स्क्रीनिंग थांबवण्याचा प्रयत्न करत आहेत. इतकेच नाही तर चित्रपटावर बंदी आणण्यासाठी मोहीम चालवली जात आहे. त्यांनी हेही सांगितले की, त्यांच्या विरोधात खोट्या एफआयआर दाखल करण्यात आल्या आहेत, ज्यामुळे ते सतत कायदेशीर अडचणींना सामोरे जात आहेत.
विवेक अग्निहोत्री यांनी असेही सांगितले की, भारताच्या इतिहासात बंगालचा अध्याय अत्यंत वेदनादायक आणि संवेदनशील राहिला आहे. त्यांनी डायरेक्ट अ‍ॅक्शन डे आणि नोआखाली नरसंहार यांसारख्या घटनांचा उल्लेख करत सांगितले की या त्रासद घटनांना इतिहासातून पुसण्याचा किंवा विसरवण्याचा प्रयत्न केला गेला आहे. त्यांचा दावा आहे की, ‘द बंगाल फाइल्स’ हा चित्रपट कुठल्याही धर्म किंवा समुदायाच्या विरोधात नाही, तर त्या शक्तींचा पर्दाफाश करतो ज्यांनी मानवतेच्या विरोधात गुन्हे केले.
दरम्यान, ही पहिली वेळ नाही, जेव्हा विवेक अग्निहोत्रींचा एखादा चित्रपट वादात सापडला आहे. याआधी त्यांचा चित्रपट ‘द कश्मीर फाइल्स’ हाही मोठ्या प्रमाणावर राजकीय आणि सामाजिक चर्चेचा विषय बनला होता. ‘द बंगाल फाइल्स’ बाबतीत देखील विरोध आणि समर्थन अशा दोन्ही प्रकारच्या प्रतिक्रिया उमटत आहेत. एका बाजूला दिग्दर्शक सांगतात की हा चित्रपट लोकांना सत्य दाखवणार आहे, तर दुसरीकडे विरोध करणाऱ्यांचे म्हणणे आहे की, हा चित्रपट द्वेष पसरवणारा आहे.
